Zitto Kabwe
Katika mtandao wake wa kijamii Mh. Zitto amedai kuwa kitendo cha Mbunge huyo ambaye ni muwakilishi wa wananchi kunyimwa dhamana ni siasa za ukomoaji ambazo zinajenga chuki kwenye jamii na chuki huwa zinazaa visasi.
"Haitoshi majaji kukemea Ofisi ya DPP, Mfumo wetu lazima uweke uwezo wa waendesha mashtaka wa aina ya kesi ya Mbunge wa Arusha Mjini kuwajibishwa. Wanasheria tazameni namna ya kuwajibisha ofisi ya DPP kwa uonevu wa makusudi dhidi ya wananchi" Ameandika Zitto Kabwe
Mkurugenzi wa mashtaka (DPP), Biswalo Mganga
Hata hivyo kauli hiyo ya Zitto imekuja mapema leo baada ya majaji watatu kutoka mahakama ya rufaa kuitaka ofisi ya Mwanasheria Mkuu wa serikali na DPP kuwa makini na kuwataka kuwashikilia watu kwa misingi ya kisheria na kuongeza kuwa haipendezi na haingii akilini mtu kushikiliwa kwa miezi minne bila sababu kwa misingi ya kumnyima haki ya dhamana.
"Mnatufanya wanasheria wote hatuna akili na mnachafua mpaka mahakama, kwa hali ya kawaida mtu mumshikilie kwa misingi ya kisheria, lakini katika kesi hii tumepitia jalada hatujaona kitu chochote cha kumshikilia Lema hadi leo na imetushtua sana". Alisema Jaji Stella Mugasha.