Rapa Billnass
Akizungumza na www.eatv.tv, rapa Billnass amesema kuwa kuna mtu atakua anahusika moja kwa moja na tukio hilo la kuchezea video za nyimbo zake pindi zinapopakiwa katika mtandao wa Youtube.
“Kuna mtu atakua anahusika aidha kwa kupenda au kimakosa, japo kwa sasa kuna mtu ambaye amenirudishia video hiyo na kwa sasa ipo sawa. Mimi sio mtaalamu sana sababu huwa natumiwa ‘link’ tu pale wimbo unapokuwa tayari umepakiwa kwenye ‘Youtube’. Na yupo mtu wangu ambaye anahusika na kupakia video za nyimbo zangu katika mtandao wa youtube. Jambo hili liliwahi kunisumbua kwenye ‘link’ ya wimbo wa 'Tagi Ubavu' mpaka leo inashida na mpaka sasa bado tunajaribu kujua watu gani wanacheza nayo”, amesema Billnass.
Awali kupitia mtandao wake wa Instagram Billnas aliandika kuwa amesikitishwa na kitendo cha video yake kufutwa katika mtandao wa ‘Youtube’ ikiwa hata haijatazamwa vya kutosha na kuwalaumu watu wenye roho mbaya kuwa ndio wamefanya kitendo hicho wakati yeye huwasapoti wanamuziki wengine kwa moyo mmoja pindi wanapotoa nyimbo zao.
“Kitendo Cha video yangu ‘ku-hackiwa’ na Kufutwa Youtube kimeniumiza sana. Video Yangu hata haina umri wa masaa mengi, waliotazama wenyewe sio wa kiivyo ndio imeanza kuingia kwenye ‘trending’ watu wenye roho mbaya wamefanya wanayoweza. Sijawahi Kufanya muziki wa mashindano, mara zote huwa nasapoti kazi za wenzangu kwa moyo mmoja pia huwa natoa nyimbo kwa muda mrefu sana nikiwa naamini kila mtu ana nafasi yake na muda wake.
Nafanya muziki wangu kujikwamua na umaskini wangu na kuiendeleza karama aliyonipa Mwenyezi Mungu, sio kumkomoa mwingine. Sidhani kama roho za namna hii zinaweza kukuza tasnia. Imeniumiza sana na inatisha sana kama Muziki wetu umefikia huku”, amesema Billnass.