Msitha ameyasema hayo leo Disemba 06, 2022 wakati akiwaaga na kuwakabidhi bendera waogeleaji wa timu ya Taifa watakaoiwakilisha nchi katika michuano hiyo ambao wanatarajia kuondoka Disemba 08 nchini kuelekea katika mashindano hayo.
Amewataka wachezaji hao kwenda kuitangaza Tanzania kupitia utamaduni wake, lugha ya kiswahili na kuipeperusha bendera ya Taifa vyema pamoja na kuzingatia nidhamu.
"Leo tunawakabidhi bendera hii na mnabeba jukumu la watanzania kwa kuitangaza nchi na mkaipeperushe vyema bendera na sina mashaka na maandalizi yenu nawaamini, msiende kinyonge serikali tupo pamoja nanyi," amesema.
Msitha ameyaomba makampuni kujitokeza kuwekeza katika michezo mingine ukiwamo wa kuogelea Ili kutoa fursa sambamba na vyama vya michezo kuiga programu za kuibua vipaji ambavyo vitasaidia kuchagua wachezaji bila upendeleo.
Naye Makamu wa Rais wa Chama cha Kuogelea Tanzania (TSA) Asma Hilal, àmesema wachezaji wapo tayari kwenda kupambana ili warudi na matokeo mazuri na ahadi kwa watanzania watafanya vizuri, huku akiwaomba watanzania kuwaombea dua na maombi timu iweze kufanya vizuri na kupeperusha bendera ya Taifa vyema.
Kwa upande wa Kocha wa timu hiyo Alex Mwaipasi ametaja wachezaji wanne watakaoiwakilisha nchi kuwa ni pamoja na Collin Saliboko, Hilal Hilal, Ria Save na Sophia Latiff.
Aliongeza kuwa wataendelea kutunza heshima na hayo mashindano ni kipimo chao cha Daraja la Kimataifa ikiwa kiu yao ni kufuzu kimataifa na walichofanya katika mashindano yaliyopita wataongeza .
Kwa niaba ya wachezaji Collins Saliboko, alisema wamejipanga vizuri na lengo lao kuu ni kuhakikisha wanapunguza muda na kufikia olimpiki.
