Papa Leo XIV amehitimisha ziara yake ya kihistoria nchini Uturuki leo tarehe 30 Novemba kabla ya kuelekea Lebanon ili kuwasilisha ujumbe wa matumaini kwa taifa lililogubikwa na matatizo ya miaka mingi na kuimarisha mojawapo ya jumuiya dhaifu za Kikristo za Mashariki ya Kati.
Akiwa ziarani nchini Uturuki Papa aliwasili mjini Ankara tarehe 27 Novemba kufuatia mwaliko wa Rais wa Uturuki Recep Tayyip Erdogan.
Wakati wa mkutano katika Ikulu ya Rais, viongozi hao wawili walijadili masuala muhimu ya kimataifa, huku papa akisisitiza haja ya kustawisha amani duniani kote haraka iwezekanavyo na kueleza matumaini kwamba safari yake ingekuza umuhimu wake katika jukwaa la kimataifa.
Mnamo tarehe 28 Novemba, Papa Leo XIV alisafiri hadi Iznik kuadhimisha mwaka wa 1,700 wa Baraza la Kwanza la Nicaea, mkutano muhimu wa Wakristo wa mapema ambao ulitengeneza mafundisho muhimu ya imani.
Jana Novemba 29, Papa alitembelea Msikiti maarufu wa Sultanahmet wa Istanbul, kabla ya kuongoza misa ya faragha mjini humo.
Lebanon, nchi yenye Waislamu wengi huku karibu theluthi moja ya wakazi wake wakiwa ni Wakristo, daima imekuwa kipaumbele kwa Vatican. Papa Leo anatarajiwa kuwatia moyo Walebanon hasa Wakristo wa Lebanon kubaki au, ikiwa tayari wamehamia ng’ambo, kurudi nyumbani.
