Vikosi vya utafutaji na uokoaji vimeendelea kutafuta miili katika eneo la Darfur magharibi mwa Sudan baada ya maporomoko ya ardhi kuzika kijiji cha mbali cha Tarasin kwenye Milima ya Marrah. Takriban miili 100 imepatikana hadi sasa, lakini Chama cha Ukombozi wa Sudan (SLM-A) kinahofia kuwa huenda idadi ya vifo ikafikia 1,000.
Maafa hayo yalitokea Agosti 31 kufuatia mvua kubwa iliyonyesha siku kadhaa. Umoja wa Mataifa unasema ukubwa kamili wa mkasa huo bado haujajulikana, kwani eneo hilo ni gumu sana kufikiwa.
"Tunachojaribu kufanya hivi sasa ni kujaribu kulifikia eneo hilo," amesema Arjimand Hussain, Meneja wa Majibu wa Kanda ya Plan International. "Kwa bahati mbaya, hakuna shirika la kimataifa la kibinadamu au shirika la Umoja wa Mataifa ambalo limeweza kufika huko kwa sababu ya mafuriko, barabara hazipiti na maji yamejaa katika mabonde."
Maporomoko ya ardhi yameongeza mzozo mbaya wa kibinadamu ambao tayari umekithiri nchini Sudan wakati vita vya wenyewe kwa wenyewe, kuhama makazi, na uhaba wa chakula vimeharibu jamii kwa miaka miwili iliyopita.
Milima ya Marrah, ni mojawapo ya Urithi wa Dunia wa UNESCO, ikijulikana kwa hali ya hewa ya kipekee, baridi na mvua zaidi kuliko maeneo jirani,jambo ambalo limechangia maporomoko ya ardhi na kuendelea kukwamisha juhudi za uokoaji.
